Ээ дээ, энэ хүүхнүүд үү...

Замбуулинд хүний биеийг  олсон  амьдрал өмнөх насанд үйлдсэн  үйлийн үрийн шагнал байж болох уу?

Гэгээрэхийг, хүний төрлөөс дээш төрлийг олохыг эрмэлзэгч хэнд ч заавал замбуулинд хүн болж төрсөн байх шалгуур байдаг гэнэм. Тэрхүү боломж нь нэг талдаа шагнал ч, нөгөө талдаа шалгалт байж болох. Учир нь эхийн хэвлийд ураг бүрэлдэхээс эхлэн,  биеэс сүнс салан холдож бие - цогцос болон хөрөх хүртэлх хүмүүний орчлонд хүн хэрхэн амьдарч, хэрхэн дуусахыг 800 гаад граммын жинтэй, хамгаалалтын ясаар бүрхэгдсэн уураг тархи хэмээх сансрын бичил мэдээллийн саныг  тэтгэгч  0,03 грамм жинтэй сүнс хэмээх биеийг амилуулагч хоёр  хүчин зүйлийг ашиглан, хүмүүн биеийг ологсод сэтгэхүй, яриа, үйлдэл гурвын үйлээр хэр хугацаанд  насжих, ямар амьдрал туулахын учир нигуурыг өөртөө талбидаг гэнэм. 

Олсон боломжийг ашиглах хувь хүртэх нь шагнал юм. Шагналыг хүртсэн бол ертөнцийн мэдээллийн сангийн хууль ёсоор сүнсний өмнөх амьдрал, мэдрэмж, мэдээлэл түр хугацаанд / хүн үүсэхээс төгсөх хүртэлх хугацаанд / арчигдах ч, оюун санааны хэмжээлшгүй эрхийг олдог. Энэ нь шалгалт юм.

Шалгалт 3 түвшинд үнэлэгдэнэ.

- Оюунаа хэрхэн удирдах / зөв, буруу /

- Оюунд боловсрогдсон сэтгэлийн үр үг хэл, яриагаар гадагшлах

- Энэхүү хоёрын үр нөлөөгөөр үйлдэгдэх бүх үйлүүд.

Зөв, бурууг хэрхэн ялгах вэ?

Биднээс өмнө энэхүү амьдралыг туулж, мэдрэгсэд бусдад  / түүний ижил замаар замнахыг хүсэгчид / хүргэж, түүний мэдрэх гэж цаг хугацаа алдсанг давталгүй тухайн өв болгон үлдээсэн гэрээслэлийг / гарын авлага / ашиглан, илүү их рүү тэмүүлэхийг хүсэмжилсэн байдаг. Эдгээр нь бурханы сургаалиуд болон бусад сургаалиуд юм. Замбуулингийн сэтгэлгээний эрх чөлөөг буруу хэрэглэснээс цагаасаа эрт хорвоог орхих, эрт орхисоноос сүнс завсрын ертөнцөд хүлээгдэх гэх мэт замналыг туулдаг байж болох.

Буддын шашин гэдэг нь амьдрах ухаан мэт, хэрхэн амьдарвал юунд хүрэхийг зөвлөсөн дотны анд гэмээр. Цэнхэртэх дэлхий дээрх үндэстэн угсаатан хэн ч / хэн гэдэгт амьтны аймаг багтана / энэ ертөнц тоос болон усталгүй  амь - амьдрал тээгчээр оршсоор байхын төлөө нэгдэн хичээх нь эргээд, бидний үр үндэсийг / генийн хэлхээ /  таслалгүй хөгжүүлэх инкобатор шиг хамгаалах орчинг бүрдүүлэх юм. Биеийн эзэн сүнс хүчтэй байх эсэх нь бидний оюун ухаанаа хэрхэн ашиглахаас хамаарна. Сүнс хүчирхэг байх аваас хувцас болсон бие элэгдэл багатай эрүүл саруул байж, эргээд ухааныг эрчтэй байлгах үүргийг хүлээдэг билээ.

Үүнийг уншигч эрхэм хүмүүн та, ийм л ховор боломжийг олсоноо ухааран, өнө  удаан  амьдрах замналаа  чиглүүлэн хичээж, энэ насны амьдрал үнэтэй ч, хойд насны оршил энэ насны туулсан түүхээс  эрхгүй чухлаар хамаардагийг нягтлан  учрыг ухах буюу ... хэмээн мунхаглан хийсвэрлэснээ бичиглэв.

Амьд бүхэн сүнстэй, эд бүр эзэнтэй билээ.